小畫家影評之「美人魚」

尋日諗住去睇美人魚，點知原來大年初一先開畫，原本覺得點掃興，突然間票務員話有午夜優先場，話晒確係真心想睇，所以食完團年飯就同友人落去睇午夜場喇^^

講真，無論係唔係賀歲片，周星馳嘅電影我確係好想睇嘅，話晒咁耐先有一套，真心有啲渴咗好耐嘅感覺，雖然睇之前冇特別好大嘅期望，皆因首先唔係星爺自己演番，其二就係星爺近年嘅戲都慢慢變得似大陸戲多過港產片喇。

果然，一開場，就見到大量粵語配音嘅國內演員，嗰種對白唔夾口型令小畫家有微微嘅唔太爽，不過好在一開場嘅第一段戲有大家熟悉嘅田雞（仲要扮番食神時嘅角色），有親切感之餘嗰段戲亦好好笑，當時全場都笑得好開心，氣氛十分之好。

故事方面，今次星爺用環保做主題，講一班美人魚（其實除咗女主角就冇人個真係「美」，全部係大叔又大嬸嚟）被人類嘅污染同填海所影響，感覺幾有教育意思，羅志祥演嘅八爪魚喺視覺上亦好有娛樂性，女主角激似舒淇，樣子討好之餘亦做到搞笑效果，美中不足嘅就係平時星爺身邊嘅「綠葉」角色唔多，雖然片中都啲駛呢配角，但點都唔夠八両金呀、黃一飛呢班配角做得出色。

總括嚟講，今次「美人魚」係合格以上，當中有唔少笑位（係真心好笑嘅），不過始終講環保議題時過份嚴肅，令到中段啲冷場，而最後飛機大炮槍戰嘅結尾又好唔周星馳（建議啲武器同船隊可以做得Q版啲，太認真一班軍人以為睇緊動作片，另外個博士又唔使搵個認真外國人嘅，搵個類似羅家英嘅「聞西」博士咪好笑囉），仲有嘅係依家海洋角色只得美人魚同一隻八爪魚，如果可以多啲海洋生物，而每隻又有自己嘅特點笑位，配上依家嘅真人CQ技術，一定超搞笑同視覺豐富好多呢~

老實講，今次「美人魚」感覺啲笑位可以緊湊番好多，話晒星爺都籌備咗唔錯嘅日子，相比王家衛會將每個鏡頭推至完美先至出街嘅話，我認為星爺未將笑位同細節推到最高，當然，如我之前所講，呢套都係合格以上嘅作品嚟，對渴咗周星馳電影好耐嘅小畫家嚟講，絕對係收貨嘅^^